ଏକା ତୁ କାଳିଆ ସତ
ଦିନେ ଯିଏ ଥାଏ ଅତି ଆପଣାର ,
ହୁଏ ଦିନେ ସାତପର !
ଦିନେ ଯେ ବୁଣଇ ଖୁସିର ଫସଲ ,
ଝରାଏ ସେ ଲୁହଧାର !!
ମିଛ ଦୁନିଆରେ ସବୁ ଲାଗେ ମିଛ ,
ଏକା ତୁ କାଳିଆ ସତ !
ଯୁଆଡ଼େ ଟାଣୁଛୁ ସିଆଡେ ଯାଉଛି ,
ଲୀଳାମୟ ଜଗନ୍ନାଥ !!
ଜୀବନ ପଥରେ କେତେ କାଚକଣ୍ଟା ,
ଲହୁଲୁହାଣ ଯେ କରେ !
ତୋ' ନାମ ଧରିଲେ ଫୁଲ ଫୁଟିଯାଏ ,
ଚଲାପଥ ଧାରେ ଧାରେ !!
ଚୋରାବାଲି ଦେହେ କେବେ ପାଦ ଖସେ ,
ଡାକିଚାଲେ ଜଗା ରଖ !
ସମୟ ଖେଳଇ ଲୁଚକାଳି ଖେଳ ,
ଦିଶେ ତୋ'ର ପଦ୍ମମୁଖ !!
ସାରୁ ପତରରେ ଜଳବୁନ୍ଦା ପରି ,
ଜୀବନ ଯେ ଢଳଢଳ !
ଏତେ ଇର୍ଷା କିଆଁ ମନରେ ପାଳୁଛ ,
ଜଳି ନିଜେ ତିଳତିଳ ।
ଜୀବନ-ପାତ୍ରରେ କେବେ ଭରିଯାଏ
ଅଗଣିତ ଖୁସି ଫୁଲ !
କେବେ ଢ଼ଳଢଳ ଲୁହ-ମୁକୁତାରେ ,
କିଏ ବା ଦେବ ତା' ମୂଲ ??
ଗୋଲାପର ଶେଯ ନୁହଁଇ ଜୀବନ ,
କେବେ ଖରା କେବେ ଛାଇ !
ଆବୁଡ଼ା ଖାବୁଡ଼ା ପଥଧାର ତା'ର ,
ପଡ଼ିଲେ ରଖିବୁ ସାଇଁ !!
କିଏ ଆପଣାର କିଏ ଏଠି ପର ,
ସମୟ ଚିହ୍ନେଇ ଦିଏ !
ତୁଇ ଜଗନ୍ନାଥ ଏକା ଅଟୁ ସତ୍ୟ ,
ତୋ' ଭାବରେ ଜିଉଁଥାଏ !!
No comments:
Post a Comment