।। ସୃଷ୍ଟିରେ ଆଣେ ସ୍ଥିରତା ।।
**********************
କୈଳାସ ଚ଼ନ୍ଦ୍ର ପାଢ଼ୀ ।
ସୂର୍ଯ୍ୟଙ୍କୁ ଗ୍ରାସିବା ପ୍ରାତଃ-କୁହୂଡ଼ିର
ହାସ୍ୟାଷ୍ପଦ ଅପଚ଼େଷ୍ଟା,
ନିନ୍ଦିତ ହୁଅଇ ସେହି ଏକା ସିନା
କର୍ମେ ଯାର ନାହିଁ ନିଷ୍ଠା ।
ପୂତ-ଅଭିଳାଷ ଆଣିଥାଏ ଯଶ
ଶତ ବାଧା ବିଘ୍ନ ସତ୍ତ୍ବେ,
ଧ୍ରୁବତାରା ସମ ଜ୍ୟୋତି-ପ୍ରକଟାଏ
ବିଶାଳକାୟ ଏ ମର୍ତ୍ତ୍ୟେ ।
ପ୍ରପଞ୍ଚ ଭାବନା ବିନଷ୍ଟ କରଇ
ଅନୁକୂଳ ପରିସ୍ଥିତି,
ପ୍ରତିକୂଳ ସ୍ଥିତି ଉପୁଜାଇ ଥାଏ
ସଂଚାର କରାଇ ଭୀତି ।
ବିଶ୍ବାସର-ପଙ୍କୁ ଫୁଟି କମଳିନୀ
ଦେବକାର୍ଯ୍ୟେ ଲୋଡା଼ହୁଏ,
ଅବିଶ୍ବାସ ଭରା ମହାକାଳ ଫଳ
ବର୍ଜ୍ୟବସ୍ତୁ ହୋଇ ରହେ ।
ସାଧନା ବଳରେ ସାଁବାଳୁଆଟି
ଦିବ୍ୟରୂପ ଲଭିଥାଏ,
ଅକର୍ମାକୋଢି଼ଯେ ପରଦ୍ରବ୍ୟ ଲୋଭୀ
ସୃଷ୍ଟିକୁ ବିଗାଡି ଥାଏ ।
କାୟ,ମନ,ବାକ୍ୟେ ସମତା ରହିଲେ
ସୃଷ୍ଟିରେ ଆସେ ସ୍ଥିରତା,
ଏ ତିନିରୁ ଏକ ବ୍ୟତିକ୍ରମ ହେଲେ
ଦେଖା ଦିଅଇ କ୍ରୁରତା ।
ବିନା ମେଘେ ବଜ୍ର- ପାତ ରଚ଼ିଥାଏ
ଅଜ୍ଞାନୀ ମୂଢ଼ ଅଧମ,
ସ୍ବର୍ଗକୁ ନର୍କରେ ପରିଣତ କରି
ପୁରାଏ ତା ମନସ୍କାମ ।
******************
କୁମାର ପୁର। ଅନନ୍ତ ପୁର।
ବାସୁଦେବପୁର।ଭଦ୍ରକ।
""""""""""""""""""""""""""""""""""""
No comments:
Post a Comment