*ଅସୁରଠୁ ହେଲୁ ହୀନ*
( ନରରାକ୍ଷସ )
""""""""''''""''''''''"""""""""""''''''""""''''"""""""''''''''''''''
ଧରମ ମାସରେ
ଉପାସ କରିଲୁ
ଧରିଲୁନି ଫାଶି ଜାଲ
ହୁଡା ବାଡ଼ ବୁଲି
ଖୋଜିଲୁନି ମାଛ
ଫେର କି ଚବକା ଖାଲ ।
ନିଇତି ଖାଇଲୁ
ଅରୁଆ ଡାଲେମା
ପିନ୍ଧିଲୁ ଗେରୁଆ ଧୋତି
ଦାଣ୍ଡରେ ଦେଖିକି
ବଳଦ କି ଷଣ୍ଢ
ତେଣ୍ଡେଇଲୁ କୁଣ୍ଡା ବୋତି ।
ଗିନି ଖୋଳ ଧରି
ସକାଳୁ ସକାଳୁ
ଚନ୍ଦନ ତିଳକ ନାଇ
କାଳି ଅନ୍ଧାରରୁ
ଗଳିରେ ବୁଲିଲୁ
ହରି ନାମ ଗାଇ ଗାଇ।
ନିରାମିଷ ସାଧା
ପଙ୍ଗତ ପାଇଁକି
ପରିବା କିଣିଲୁ ବାଛି
ଜୀବେ ଦୟାବହି
ମାସଟି କାଟିଲୁ
ମାରିଲୁନି ସିନା ମାଛି ।
କୁଣ୍ଡରେ ପୋଷିଲୁ
ମାଗୁର ଶେଉଳ
ପାଳିବାକୁ ଛାଡଖାଇ
ଭୋଜିଭାତ ଖଟି
ପାଇଁକି ବିକିଲୁ
ପଠାଣକୁ ଛଡା ଗାଈ ।
ଶହେ ମେଣ୍ଢା ଛେଳି
କୁକୁଡ଼ା ମାରିକି
କରୁ ଛାଡଖାଇ ମଜା
ମିଛରେ ଧରମ
କରୁଛୁ ଭାବିକି
ମନେ ମନେ ଖାଉ ଖଜା ।
ପାଟି ଚିପି ଚିପି
ଚାହିଁକି ରହିଲୁ
କେମିତି ସରିବ ଦିନ
ଏତେ ଉପବାସ
ବରତ କରିକି
ଅସୁରଠୁ ହେଲୁ ହୀନ ।
ଯେଉଁ ପାଟିରେ ତୁ
ନିତି ପଢୁଥିଲୁ
ବେଦ ଭାଗବତ ଗୀତା
ସେ ପାଟିକି ମଦ
ମାଉଁସ ଛାଡ଼ିକି
ସବୁ ହୋଇଗଲା ପିତା ।
ମଣିଷ ହୋଇକି
ପଶୁ ପାଲଟିଲୁ
ଭୁଲିଗଲୁ ଭଲମନ୍ଦ
ଚୂଲିକି ଯାଉ ତୋ
ଚିତା ଚଇତନ
ପେଟ ପାଇଁ ହେଲୁ ଅନ୍ଧ ।
ବଜାର ହାଟରେ
ଛାଲ ଉତାରିକି
ଟଙ୍ଗାହେଲେ ମେଣ୍ଢା ଖାସି
ପୋକ ଡାଉଁଡାଉଁ
ମାଉଁସ କିଣିଲୁ
ହେଉ ପୋଚରା କି ବାସି ।
ଚିକେନ୍ ମର୍ଟନ
ଖାଇବା ପାଇଁକି
ଏତେ ହାଇଁପାଇଁ କିଆଁ
ଛହାତେ ମାଟିରେ
ଜଳୁଥିବ ଦିନେ
ତୋ ହାଡ ମାଉଁସ ନିଆଁ ।
କଙ୍କିଟିଏ ପାଇଁ
ଉହୁଙ୍କି ଉଠୁଛୁ
ଗିଳିଲାଣି ପରା ସାପ
ପଶୁ ପକ୍ଷୀ ମାରି
ରେ ନର ରାକ୍ଷସ
କାହିଁକି କରୁଛୁ ପାପ ।
""""""""""""""""""""""""""""""""""'"'""""""""""""
ପ୍ରସନ୍ନ ମଣ୍ଡଳ
କୋଟପଲ୍ଲା, ଖୋର୍ଦ୍ଧା
No comments:
Post a Comment