ଲାଗୁଛି ଯେମିତି କାଲି
-------------------------------------------------
ଭୁଲି ହେବନାହିଁ
ସେଦିନର କଥା
ଯାହାବି ଯାଇଛି ଚାଲି
ତେଇଶି ବରଷ
ବିତିଲାଣି ସିନା
ଲାଗୁଛି ଯେମିତି କାଲି ।
ଭାସିଗଲା କେତେ
ସୁନାର ସଂସାର
ସମୂଦ୍ର ଆସିଲା ମାଡ଼ି
କୂଳରେ ଦିଶିଲା
କୁଢକୁଢ ଶବ
ଚିଲ ଶାଗୁଣା ଙ୍କ ଧାଡ଼ି ।
ବୁଢ଼ା ବାପା ହାତ
ଛାଡିଦେଇ କେତେ
ଭେଣ୍ଡାପୁଅ ଗଲେ ଭାସି
ଗଛରେ ବାଡ଼ରେ
କୁଢକୁଢ ମଢ
ମୁରଦାର ହେଲା ବାସି ।
ଚିହ୍ନି ପାରିଲେନି
ପ୍ରିୟ ପରିଜନ
ଖୋଜିଖୋଜି ନିଜ ଲୋକ
ଜାଣିବା ଆଗରୁ
ଝୁଣିଦେଲେ ହାଡ
ବିଲୁଆ ଶାଗୁଣା ପୋକ ।
ଉପୁଡ଼ି ପଡିଲା
ମହାମହା ଦୃମ
ପଡିଆ ହୋଇଲା ଗାଆଁ
ଦିଶିଲାନି ଆଉ
ସୀମା ସରହଦ
ଛପିଗଲା ସବୁ ନାଆଁ ।
ମାଆ ହାତ ଛାଡି
ଭାସିଗଲେ ପୁଅ
କୋଳ ହୋଇଗଲା ଖାଲି
ଗାଆଁ ଦାଣ୍ଡ ବାରି
ବାରି ହେଲା ନାହିଁ
ଚାରିଆଡେ ଖାଲି ବାଲି ।
ଲିଭିଗଲା କେତେ
ମଥାର ସିନ୍ଦୁର
ଖାଲି ହୋଇଗଲା ଘର
ଦାଣ୍ଡରେ ଜଳିଲା
ଶହ ଶହ ଜୁଇ
ସଞ୍ଜରୁ ଲାଗିଲା ଡର ।
ଟିଭି ରେଡିଓରେ
ଖବର ଶୁଣିକି
ଲୋକେ ଯାଉଛନ୍ତି ଡରି
ଅକ୍ଟୋବର ହେଲେ
ସଜାଡି ରଖନ୍ତି
ତମ୍ବୁ ସତରଞ୍ଜି ଜରି ।
ନଆସୁ ଏମିତି
ଘୁର୍ଣ୍ଣି ମହାବାତ୍ଯା
ନରଚୁ ପ୍ରଳୟ ଆଉ
ମୋର ଗାଆଁଗଣ୍ଡା
ସହର ବଜାର
ସେମିତି ଭଲରେ ଥାଉ ।
-------------------------------------------------
ପ୍ରସନ୍ନ ମଣ୍ଡଳ
କୋଟପଲ୍ଲା, ଖୋର୍ଦ୍ଧା
No comments:
Post a Comment